‘MaAccountants ari pakati pehuwori muZimbabwe’

MaAccountants ari pakati pehuwori uye kubiwa kwemari mumakambani mazhinji ehurumende neakavanzika, akadaro acting auditor-general Rheah Kujinga.

Kujinga, aitaura pamabiko ekupedza kudzidza eACCA kuPremier Business School (PBS), akataura kuti zvakakosha kuti maaccountants neauditors vaite basa ravo nenzira ine hunhu uye vadzivise kuita accounting inoburitsa mari inorasikirwa nehurumende.

“Tine zvinonyadzisa zvakawanda mumasekete ehurumende neakavanzika, zvimwe zvichiitwa nemaaccountants ane zvitupa, nditendei, ndakaona zvakawanda izvi panguva yandiri kushanda. Hatitarisiri izvozvo kubva kwamuri semuPBS uye semuACCA professional,” akadaro.

Kubva paakatora chigaro cheauditor-general achitsiva Mildred Chiri, Kujinga akaburitsa mishumo yeaudit inoratidza huori hwakanyanya mumasangano ehurumende uko mari yevateresi inonyangarika pasina kutongwa kwevapari vemhosva.

Kujinga akati kana maaccountants akatadza kuita zvehunyanzvi uye nehunhu, zviito zvavo zvinokanganisa kudzoreredza hupfumi uye mabasa.

“Tinotarisira kukuonai muchiita mutsauko muhupfumi sezvamunobatsira vashandirwi venyu vemazuva ano uye vemangwana kuti vararame uye vabudirire. Musakwevera basa iri mukunyadziswa nekuda kwechiokomuhomwe,” akadaro.

Achitaura pachiitiko chimwe chete, muvambi wePBS Ngoni Robins akati hunhu mubasa reaccounting ndihwo hwaro hwekuvaka nyika uye kukura kwehupfumi.

Ari qualified chartered accountant, Robins akati sezvo PBS yakura kubva pakoreji ine vadzidzi vatatu kusvika pachinzvimbo chayo chazvino uko maaccountants makumi matatu akapedza kudzidza husiku humwe chete, hunhu, kutsungirira, uye kutenda ndizvo zvakaita kuti sangano iri rirambe richibudirira.

“Pane imwe nguva taive nevadzidzisi vakawanda kudarika vadzidzi, takatadza kubhadhara rendi, izvo zvakaita kuti dzimwe nguva tivharwe kunze nemuridzi wemba. Nhasi tinozvikudza sePBS kuenda nevadzidzi vanova mienzaniso yehunhu nehunyanzvi mundima yeaccounting,” akadaro.